مقاتل من الجيش السوري الحر..

‎معروكة منى

‎على الطريق الواصل بين سرمدا ومدينة إدلب تحديداً عند بلدة حزانو
‎شب تقريباً عمره ٣٠ سنة عم يمشي جنب الطريق باتجاه مدينة ادلب وعم يعرج على رجله
‎وقفت قلتله مرحبا وين رايح؟
‎قلي رايح على المعرة
‎قلتله أطلع معي أنا رايح على أريحا بنزلك فيها وبتكمل طريقك على المعرة
‎صار يحكي حكي مو مفهوم ويعمل حركات غريبة بايده
‎قلتله خلص اسكت وروق
‎فكرته مجنون
‎سكتنا شوي
‎رجعت سألته أنت شو اسمك
‎قلي اسمي ع ا
‎من وين أنت يا ع
‎قلي أنا من ح ضيعة بسهل الغاب ريف حماه
‎لما حكا هيك عرفت أنه مو مجنون بس في شي غلط بالموضوع
‎سألته شبها رجلك ليش عم تعرج عليها
‎قلي أنا معي شلل نصفي

‎طبعا فيكون تتخيلو كيف عم يحكي شخص بعاني من شلل نصفي يا دوب عم يطلع معاه كلام مفهوم

‎سألته كيف صار فيك هيك؟
‎قلي قصفوني أنا ورفقاتي وتصاوبت وصار معي هيك
‎مين رفقاتك؟ ليش وين كنت؟
‎قلي من سنتين كان في معركة بصوامع المنصورة كنت أنا ورفقاتي ب بيك آب ومعنا مضاد دروع ماشين بمنطقة مكشوفة
‎ضربنا صاروخ كورنيت من الجيش
‎تصاوبوا رفقاتي واستشهدوا وانا ضليت عايش بس نشليت
‎أنت رفقاتك جيش حر يعني؟
‎أي
‎يعني أنت كنت مقاتل
‎قلي ومقاتل شرس كمان

‎الموقف هون خليك عم تتخيل أنه الشخص إلي عم يحكي مشلول شلل نصفي وعم يحاول يكون طبيعي بلغة الجسد والحركات والكلام
‎بس عم تطلع كل حركاته وكلماته مشوهة
‎ما بينوصف كتير صعب المشهد
‎هو مو عاجز هو عم يتحدى ويقاوم عجزه

‎كانت عيوني عين عليه وعين على الطريق
‎سألته بعدها
‎وأنت وين ساكن هلق؟
‎ساكن بخيمة بمنطقة ق مخيم اسمه ف
‎مين ساكن معك؟
‎مرتي ومنى وأحمد
‎منى وأحمد ولادك؟
‎أي
‎أديش عمرهون؟
‎منى 4 سنين وأحمد سنتين
‎طيب وأنت لعند مين رايح بالمعرة؟
‎رايح لعند رفقاتي
‎رفقاتك!
‎أنت بتعرف أشو في بالمعرة؟
‎لا والله ما بعرف
‎قلتله المعرة فاضية مافيها ناس الطيران عم يقصفها ليل نهار اذا رحت لهنيك رح تموت
‎حكا كلمتين تلاته ما فهمت عليه أشو قصده

‎قلتله طيب ليش رايح لعند رفقاتك
‎قلي
‎( رايح أشحد مصاري )
‎أوف وليش لحتى تشحد
‎ليش الفصيل إلي كنت معاه ما عم يساعدك
‎كمان رجع حكا كلام ما فهمت عليه
‎يا دوب كلامه مفهوم
‎بس فهمت من تعابيره أنه ما حدا سأل عليه ورموه بعد ما أصيب

‎سكتنا شوي هون
‎رجع ع حاكاني
‎قلي لازم أرجع اليوم على الخيمة
‎قلتله ليش؟
‎قلي منى عم تستناني

‎( فاقت الصبح قالتلي يا بابا بدي معروكة
‎قلتلها يا بابا والله ما معي مصاري من وين بدي جبلك معروكة
‎قالتله وبدي برتقانة )

‎عم يحكي معي وهو عم يبكي وما عم يقدر يبكي
‎صعب ينوصف الموقف
‎صعب كتير

‎قلتله بيرزقك الله يا ع وبتجبلها معروكة

‎قلي أيييييييييه بيرزق الله

‎سكتنا مرة تانية
‎حسيت هون أنه الطريق بين حزانو وإدلب أطول من الطريق بين الشام وإسطنبول
‎داقت فيي الدنيا ونربط لساني ما بقا أعرف أتصرف أو أحكي شي

‎أب مشلول عمره ٣٠ سنة طالع من خيمة يشحد حق معروكة لبنته
‎معروكة يعني كعكة
‎كعكة حقها ٢٠٠ ليرة بالكتير
‎يعني ٢٠ سنت
‎كان مقاتل بالجيش الحر
‎أصيب
‎خلصت صلاحيته
‎ما عاد ينفع

‎يا رب القهر

‎قلتله أنت باينتك بتدخن
‎خود سيغارة
‎قلي هي السيغارة آخر مرة شربت منها من ٣ سنين

‎ما معي ما معي
‎وبكي
‎وأنا داقت الدنيا في أكتر
‎اختنقت
‎سكتنا كمان

‎بعدها رجعنا حكينا شوي من شان يغير طريقه وما يروح على المعرة
‎واقتنع انه ينزل بادلب وما يروح على المعرة
‎نزل عند دوار المحراب
‎قلي من وين طريق السوق
‎قلتله من هون
‎فتح باب السيارة
‎وقلي
‎أنا رايح جيب المعروكة لمنى
‎وراح
Anas Tracey

اترك رد